Macedonian Timeline Australia

Секоја држава си има свое историско минато и најчесто тоа се огледува во изградените монументи на градските плоштади. И самиот збор монумент значи ‘да се памети‘. Освен ‘да се памети‘, спомениците го разубавуваат самиот град и му даваат посебна препознатливост. Подигнување на споменици се правело уште од најстари времиња. Само на тој начин живите се оддолжуваат, генерациите паметат и почитуваат нивното дело. Така се создава традиција на систематско комеморирање на минатото, историските настани, заслужните личности на една земја. А уште позначајно е тоа што преку нив наредните генерации ќе имаат јасна визија за своето потекло, ќе осознаат повеќе за своите корени и продолжуваат да творат, и борат за македонската кауза во новосоздадените услови. Што би биле денес без она што ни го оставија предводниците за развој на писменоста, науката ,светите Кирил и Методиј, светите Климент и Наум Охридски, светите Теофилакт Охридски и Прохор Пчински,Григор Прличев, браќата Миладиновци, Крсте Мисирков...

Деновите во издание на Македонското Литературно Друштво „Григор Прличев“ од Сиднеј излезе од печат драмското дело „Празни надежи (Баба бегалка)“ од Душан Ристевски. Издавањето на книгата е финансирано од Австралиско македонскиот театар од Сиднеј. Рецензијата на драмата е од познатиот писател Александар Донски кој што забележа дека „Драмата од плодниот и докажано квалитетен драмски писател и поет Душан Ристевски под наслов „Празни надежи (Баба бегалка)“ ни осветлува уште еден сегмент од животот на Македонците во Австралија, кој освен етнокултурниот аспект (мешаното зборување на македонски и англиски во рамките на едно исто семејство, животната филозофија зачинета со примеси од обете материјално-духовни култури и сл.), нуди и универзална повеќеслојна димензија релевантна за припадниците на сите народи, а тоа е судирот на генерации и карактери во семејната заедница и животните премрежја на лицата во трето доба“.