Пишува: Гордана Димовска
Во чест на овој најголем верски и национален празник, ние Македонците насекаде во светот со длабока почит се присетуваме на три светли датуми од македонската историја.
338 п.н.е. Битка кај Херонеја – 18-годишниот Александар ја предводел Македонската коњаница на својот татко против силите на Теба, Атина и други грчки сојузници. Битката била убедлива победа за Филип и Македонците.
По точно 123 години од Илинден 1903 и 82 години од АСНОМ, нашиот втор Илинден 1944, сите ние, на различен начин но со иста цел, - да се оддаде почит кон делото на нашите востаници, револуционери, борци кои ги положија своите животи за слобода на нашата татковина Македонија. Колку повеќе се оддалечуваме временски од овој настан, толку поголемо станува неговото значење.
На Мечкин Камен на тоа свето место, останаа коските на илјадниците саможртвеници за најсветиот идеал, за национална слобода и самостојност. Големи беа материјалните и морални жртви кои ги поднесе македонскиот народ во текот на востанието . Во 203 борби што ги воделе востаниците со турскиот аскер зеле учество околу 26 000 востаници и 350 000 турска војска. Околу 150 села, или 9.850 домови, биле делумно или целосно изгорени, околу 58.000 луѓе останаа без домови.Во текот на борбите беа убиени 8.816 луѓе а над 10.000 Македонци емигрирале од Македонија
Истакнатиот револуционерен деец Димо Хаџи Димов рече Македонија го има својот прв Илинден проследуван од крвави дни на разорување и тешки страдања ..таа ќе го има и својот втор Илинден...Земји што имаат народни манифести како Илинден 1903 година – не умираат. Тие манифести стојат погоре од договорите за мир, од политичките шпекулации, од трговијата со народите. Светските историчари го нарекуваа Илинден како некаков оган што гори и ја осветлува цела Македонија. Ирскиот патриот Роџер Кејсмент рекол дека нема видено потрагична историја од онаа на Ирска и на Македонија.
Илинденскиот дух и решеност да се бори за своите права имаа силно влијание за иднината на сите наредни генерации Македонци, тогаш и денес. Македонските генерации со тоа беа обврзани да ги чуваат илинденските традиции , да ги развиваат и прилагодат на нови услови за борба.
Па така,поведен од идејата за слободна држава, и поттикнат од храброста и саможртвувањето на илинденците од 1903, македонскиот народ повторно поведе војна овојпат, против фашистичкиот окупатор. Младата интелигенција во НОБ ја продолжи борбата за слободна Македонија.После четиригодишна војна, успеа да ги оствари соништата на борците од историското Илинденско востание, ВМРО, и безброј други востанија и обиди за слобода. Уште еден значаен ден, уште еден 2-ри август, уште еден светол ден,Илинден но во 1944 година. На 2 Август, 1944 година во манастирот Прохор Пчински со одржувањето на второто заседание на АСНОМ се прогласи за самостојна современа македонска држава.Македонија конечно се здоби со самостојност и слобода
Македонија е земја богата со историја а Илинден е само уште еден повод повеќе за потсетување на македонското мачно минато под турско ропство.
Ја имаме таа чест и привилегија да го одбележиме празникот Илинден на достоинствен начин како што доликува.
Иако живееме далеку од својата родна земја, ние македонците во Мелбурн сме најубедлива и најсилна врска помеѓу две култури, македонската и австралиската..
Со одбележувањето на македонските национални празници и овде во Австралија имаме можност да се пронајдеме и дефинираме како културна и цврста заедница во австралиското општество.
Оддавајќи им почит на нашите претци, борци за слобода на Македонија, се потсетуваме на нивниот стремеж, јака волја за ослободување од тиранијата и создавање на самостојна држава без ропства и покорување. Нека нивната саможртва ни биде инспирација и поттик за тоа како се чуваат и негуваат националните вредности и како се бори за правото на себедефинирање, духовна и национална слобода зачувување на светиот симбол, вековното име Македонија. Македонија за век!
Повикувајќи се на борбениот дух и стремежот за национална слобода на нашите Илинденци и борци во НОБ , ние, Македонците на сите меридијани на светот треба да останеме верни на нивните заложби и понатаму верно да ја чуваме и браниме нашата заедничка мајка Македонија. Илинден е како сонце кое ги огрева и полни срцата на милиони Македонци ширум светот. Да им оддадеме достојна почит на сите кои ги положија своите животи за слободна Македонија и да не заборавиме на овој светол датум во Македонската историја .
Слава и чест на паднатите борци за слободата на Македонија.
Comments
Post a Comment