НОВОГОДИШНО И ЕКСKЛУЗИВНО ИНТЕРВЈУ СО СИМЕ МЛАДЕНОВСКИ

"Без разлика што и да се случува, сепак, позитивната мисла треба да опстане и човек треба да се труди по секоја цена да остане оптимист, иако навидум тоа е невозможно, бидејќи стравот и песимизмот како најподмолни убијци на среќата и животот единствено можат да се победат со чист и нескршлив дух." - Симе Младеновски.

МТ- Eве не и кон крајот на уште една година и би сакале да ве запрашаме каков е овој период за вас како продуцентска куќа?

СМ - Во периодот кога се ближи Новата Година, нашите работни обврски сè повеќе се интензивираат, а тоа значи дека веќе започнавме со снимање на новогодишна програма на Тв Сонце, но и новогодишно издание на Лица и дела во кое аудиториумот ќе има можност да проследи нешто интересно, ново и иновативно.

 МТ- Кога сме кај нешто ново и иновативно ќе ни откриете ли што се спрема, кои се ваши идни планови за настапи?

СМ - Во однос на мојата дејност, продуцент, веќе сум влезен во првите 5 продуценти за 2022 година, во Македонија. Исто така, со екипата за којашто веќе сум зборувал многу пати, со која работиме на документарните филмови, периодов исто така интензивирана е и таа дејност, така што со веќе најавениот документарен филм „Родна грутка“ кој е посветен на сиромаштијата во Македонија, се подготвуваме за учество на еден фестивал за документарни филмови во Женева. Нормално, со оглед на нашиот огромен труд и вложената работа, очекуваме значителни резултати.

МТ – Што е карактеристично за новиот филм Родна грутка?

СМ -  Сетингот на овој документарец е многу специфичен и исполнет со специфични и убави места преку кои аудиториумот воедно ќе ги види и ќе ги запознае убавините на нашата земја, со кои сите ние се гордееме и покрај темата на самиот документарец која некако постојано се наметнува и некако се добива впечаток дека е непремостлива. Во однос на темата, во овој филм се опфатени неколку семејства кои се во незавидна животна ситуација и за кои се чини дека живот во нормални и човечки услови е апсолутно недостижен, но ние преку сето тоа сакаме да пренесеме една многу важна порака – без разлика што и да се случува, сепак, позитивната мисла треба да опстане и човек треба да се труди по секоја цена да остане оптимист, иако навидум тоа е невозможно, бидејќи стравот и песимизмот како најподмолни убијци на среќата и животот единствено можат да се победат со чист и нескршлив дух.

 МТ - Планови со емисијата Лица и Дела?

 СМ -  За Лица и дела можам да кажам дека продолжува и понатаму да претставува лица кои се во и надвор од Македонија, но кои ретко се појавуваат на медиумите, а нивната работа навистина е од голема важност и оставила огромен белег во општеството, со што всушност, оваа сезона Лица и дела добива посебна димензија, различна од она што до сега е емитувано. Можам со гордост да истакнам дека на Лица и дела продолжува да работи истиот тим како и до сега и секако останува во ТВ Сонце, така што јас, како продуцент, Мери, како уредник и водител и сета останата екипа, гарантираме уште многу убави и корисни содржини кои ќе бидат забележани и гледани. Освен ова што до сега го наведов, работам на уште многу проекти, а како новитет можам да истакнам дека сум официјален менаџер на рок бендот Акарма којшто во блиска иднина ќе се претстави со својата музика и сигурен сум дека нивниот пат до врвот е веќе загарантиран.

Оваа можност ја користам на вашата екипа и на вашите ценети читатели да ја честитам Новата Година и претстојните празници, секако со порака, останете безбедни и зачувувањето на здравјето да биде на прво место, со надеж дека во скоро време животот повторно ќе се врати во нормален тек.

МТ – Благодариме, Несомнено имавте плодна 2021 година и најискрено ви честитаме за сите постигнати резултати и посакуваме уште повеќе остварувања и награди во Новата 2022 година. Знаејќи со каков елан и интензитет работите не се сомневаме дека успесите во Новата година нема да изостанат. Најважно од се е да не престанете со она што го сакате и да не престаните да ја промовирата Македонија во вашите проекти. Ви благодариме на соработката и да продолжиме така и во 2022.

6.12.2021

Macedonian timeline Australia