ОД АКТИВНОСТИ НА АМЕРИКАНСКО - КАНАДСКО – МАКЕДОНСКАТА ЦРКОВНА ЕПАРХИЈА
Од 29 до 31 август 2025 година, на Денот на трудот во САД, во Македонската православна црква „Св.Кирил и Методиј“ во Сидер Гроув, Њу Џерси, се одржа
51 - от Црковно народен собор на Американско-канадско македонската православна епархија, на кој чиноначалствуваше Неговото Блаженство г.г. Стефан, Архиепископ Охридски и Македонски.
Овогодишниот Црковно народниот собор на Американско-канадско македонската православна епархија беше продолжение на педесет предходни собори, кои се одржуваат секоја година во различни градови и тоа во првата недела од септември и траат три дена. Тие се исполнети со богати црковно-духовни, културно-просветни и спортски манифестации, како и со други содржини и активности.
Собирските манифестации се многу богати, сеопфатни и импресивни. Со проширени искуства и знаење, црковните општини се поттикнуваат на покрупни остварувања преку градба на просторни импозантни цркви и културно-просветни центри, со цел што повеќе да се привлече вниманието на младите Македонци.
Овие значајни и традиционални, собирски манифестации се одржуваат секоја година во првата недела од септември, на Денот на трудот. Тие траат три дена и се со богати црковно-духовни, културно-просветни и спортски манифестации, како и со други содржини и активности. На епархиските и црковно-општинските органи и тела им се пружа извонредна пригода да ги поддржуваат, инспирираат и да ги помагаат севкупните позитивни процеси за уште посестран и побогат развој на секциите при црковните општини, на неделните училишта на македонски јазик, македонските играорни групи, хоровите, драмските активности, женските секции, спортот и сите други здружени креативни сили кои придонесуваат за посилен растеж на црквите и Епархијата.
Според историските документи Американско-канадско македонската православна епархија беше формирана на 12 септември 1981 година, кој е светол датум за Македонците од САД и од Канада, кога во МПЦ “Св. Димитрија” во Рочестер, во државата Њујорк, митрополитот г. Кирил ги потпиша документите и го означи законското регистрирање на Епархијата во присуство на видни личности од македонските заедници, свештени лица и пред американски адвокат.
По одржувањето на молитвата во храмот “Св. Димитрија”, во хотелот “Американа”, во кој се наоѓаше канцеларијата на адвокатот, со потписите на архиерејот и архиерејскиот заменик, првпат надвор од границите на Македонија се озакони и се призна епархија на Македонската православна црква. Во тој период, Епархијата ја сочинуваа 15-на црковни општини со десетина парохиски свештеници. Со тоа Епархијата стана и нераскинлив дел на мајката Светиклиментова црква во Македонија.
Црквата „Св,Кирил и Методиј“
Веста за регистрирањето на Епархијата брзо се разгласи преку средствата за јавно информирање во македонските, американските и во канадските медиуми. Меѓутоа, посебно внимание на овој настан посвети њујоршкиот дневен весник “Тајмс Јунион”, на чии страници беше објавено законското регистрирање на Епархијата, постоењето на Македонската православна црква и на македонската нација во целина.
Денес, една од најважната активност на Американско-канадската епархија е Црковно-народниот собор, кој се одржува секоја година почнувајќиод 1975 година. Првиот собор се одржа во Торонто во 1976. Во оваа Епархија до денес се отворени вратите на над 30 цркви и два манастира, во кои служат триесетина македонски свештенослужители чии надлежен архиереј е митрополитот Методиј.
Овогодишниот Црковно народниот собор на Американско-канадско македонската православна епархија беше одржан во МПЦ „Св. Кирил и Методиј“ во Сидер Гроув. Оваа црква е како продолжување на традициите на изгорената православна македонска црква „Св. Кирил и Методиј“ во Пасаик. Македонците од Њу Џерси во 1993 година решиле да градат нова црква.Така е купено место од десетина хектари заедно со времена сала во 1994 година, на кое е изградена македонска православна црква, исто така во стилот на Св. Богородица во Калиште,односно по планот на црквата Св. Никола во Кентон,Охајо, но со зголемени димензии. Потоа на 7 август 1993 година бил осветен камен-темелникот од митрополитот Михаил. На оваа свеченост меѓу другите присуствуваше и тогашниот претседател на Република Македонија г-дин Киро Глигоров и првиот македонски амба садор во САД, д-р Васко Наумовски.
Во рамките на црковната општина активно работи КУД “Гоце Делчев”, фудбалскиот клуб “Македонија”, Комитетот за човекови права, Неделно училиште, Женска секција, Црковен хор, Библиотека и неколку музички состави.
Инаку на овогодишната соборска манивестација на Американско-канадско македонската православна епархија, на 29 август во големата сала на Македонската православна црковна општина “Свети Кирил и Методиј” во Сидер Гроув, се одржа Младинска игранка.
Вчера на 30 август предручек се одржа турнир во мал фудбал и седница на Епархиското собрание на Американско-Канадската епархија на МПЦ-ОА и вечерна богослужба потоа се одржа смотра на играорните групи и младинска игранка во црковната сала на МПЦО “Свети Кирил и Методиј”.
На 31 август, пред ручек се одржаа финалните натпревари на фудбалскиот турнир и Божествена литургија на која чиноначалствуваше Неговото Блаженство г.г. Стефан Архиепископ Охридски и Македонски и на Јустинијана Прва, во сослужение со Неговото Високопреосвештенство г. Методиј Митрополит Американско-Канадски и свештенослужители од Скопската и Американско-Канадската епархија. По повод роденденот на митрополитот на Американско-Канадски, Неговото Блаженство г.г. Стефан Архиепископ Охридски и Македонски му додели панагии.
Вечерта се одржа Гала банкет и доделување на награди, а од 22 часот повторно беше приредена забава за младите Македонци од САД и Канада.
Црковно-народниот собор на Американско-канадската македонска православна епархија е традиционален демонстрирајќи го 51 година единството и традициите во Македонската православна црква - Охридска архиепископија и Јустинијана Прва и во Македонската заедница во САД и Канада.
Притоа треба да се нагласи дека мисијата на македонските свештеници во САД и Канада, на чело со денешниот митрополит г.Методиј како надлежен архијереј на Американско-канадско-австралиската епархија на МПЦ-ОА е драгоцена. Тој, заедно со свештениците и со активистите од македонските асоцијации се целосно посветени на обединувањето на македонскиот народ во САД и Канада, каде што живеат Македонци од сите делови на етничка Македонија.
Сите настани во рамките на 51-от Црковно-народен собор на Американско-канадската македонска православна епархија ќе останат незаборавни моменти. Тоа беше настан на бројни дружења и познанства меѓу Македонците од бројните македонски-православни црковни општини од САД и Канада.
Пишува: СЛАВЕ КАТИН
Comments
Post a Comment